کوئلے کی قلت: وزیر توانائی آر کے سنگھ نے وزارت اور نجی کمپنیوں کے عہدیداروں کے ساتھ ملاقاتیں کیں۔ تاہم وزیر توانائی نے واضح طور پر کہا تھا کہ ملک میں بجلی کا کوئی بحران نہیں ہے اور نہ ہی ایسا ہونے دیا جائے گا۔
نئی دہلی: ملک بھر کے پاور پلانٹس میں کوئلے کی فراہمی میں کمی سے نمٹنے کے لیے مرکزی حکومت نے کوششیں تیز کر دی ہے۔ ذرائع کا کہنا ہے کہ وزیراعظم آفس (پی ایم او) منگل کو کوئلے کی فراہمی کی صورتحال کے حوالے سے ایک جائزہ لینے والا ہے۔ یہ قدم ملک کے کئی شہروں میں بلیک آؤٹ کے بڑھتے ہوئے خدشات کے درمیان اٹھایا گیا ہے۔ اس سے پہلے وزیر توانائی آر کے سنگھ نے وزارت اور نجی کمپنیوں کے عہدیداروں کے ساتھ میٹنگ کی ہے۔ تاہم وزیر توانائی نے واضح طور پر کہا تھا کہ ملک میں بجلی کا کوئی بحران نہیں ہے اور نہ ہی ایسا ہونے دیا جائے گا۔ کوئلے کے ذخیرے پر آر کے سنگھ نے کہا تھا کہ انہوں نے کوئلہ کے وزیر پرہلاد جوشی سے بات کی ہے اور کوئلے کی فراہمی بڑھانے کی کوششیں تیز کردی گئی ہیں۔
دہلی ، پنجاب ، راجستھان ، اڈیشہ اور آندھرا پردیش سمیت تمام ریاستوں نے اپنے ریاستی پاور پلانٹس میں کوئلے کی کمی کی شکایت کی ہے۔ ان ریاستوں نے کول انڈیا لمیٹڈ سے کوئلے کی فراہمی بڑھانے کی درخواست بھی کی ہے۔ مہاراشٹر میں بھی کوئلے کی قلت نے بجلی کا بحران پیدا کیا ہے۔ ریاست میں 7 تھرمل پاور پلانٹس کے 13 یونٹوں میں بجلی کی پیداوار رک گئی ہے۔ چندر پور ، بھوسوال اور ناسک کے پاور پلانٹس پر پیداوار متاثر ہوئی ہے۔
