مرکزی کابینہ کی آج کی میٹنگ میں تین زرعی قوانین کو واپس لینے کی مودی حکومت کی تجویز کو منظوری دے دی گئی ہے۔
اس طرح حکومت نے نئے قوانین کو واپس لینے کی طرف پہلا قدم اٹھایا ہے۔ یہی تجویز اب پارلیمنٹ میں پیش کی جائے گی۔اگرچہ حکومت نے ابھی تک سرکاری طور پر کابینہ کے اجلاس میں لیے گئے فیصلے کا اعلان نہیں کیا ہے، لیکن امکان ہے کہ کابینہ کے وزیر انوراگ ٹھاکر اس معاملے پر سہ پہر تین بجے اعلان کریں گے۔
یہ بل 29 نومبر سے شروع ہونے والے پارلیمنٹ کے سرمائی اجلاس میں پیش کیا جائے گا۔ پی ایم او کی سفارش کی بنیاد پر، وزارت زراعت نے تین نئے قوانین کو منسوخ کرنے کے لیے ایک بل کا مسودہ تیار کیا ہے۔
جب پارلیمنٹ میں بل کو حتمی شکل دی جائے گی تو اس پر بحث اور ووٹنگ ہوگی۔بل کی منظوری کے بعد اسے صدر کے پاس بھیجا جائے گا اور صدر کے دستخط ہوں گے۔اس کے ساتھ ہی تین نئے زرعی قوانین کو منسوخ کر دیا جائے گا۔
